Fabulatorio | Caderno de notas

Imprimindo ‘Ostalgia’ Xa queda menos!. O pasado...

Mon, 06 May 2013 04:46:00 -0400

Imprimindo ‘Ostalgia’

Xa queda menos!. O pasado xoves imprimimos a tripa do libro Ostalgia de Simona Rota na rotativa de Galicia Editorial.

Dende hai un tempo, case á vez que comezamos a editar os contidos dun libro, ou a debuxar as primeiras ideas nun caderno, pensamos onde e con que tecnoloxía imos imprimir. É unha sorte que a día de hoxe, en Galicia, poidamos aínda decidir facelo ben nunha pequena imprenta, case artesanal, empregando unha Heidelberg de aspas, ou ben ao contrario, nunha rotativa que ocupa máis de 6.000 m2 de nave nun polígono industrial.

A posibilidade de imprimir Ostalgia nunha rotativa xurdiu, xa que logo, moi no inicio. Ademais dos condicionantes económicos, tiñamos a intuición de que as fotos de Simona contaban unha historia que se axustaba moi ben ao resultados que se poden esperar de imprimir nunha rotativa. Non resulta doado explicar as intuicións, pero a primeira vez que comezamos a ver a serie Ostalgia tivemos unha sensación semellante á que se ten cando se volve a un xornal duns días, meses ou anos atrás: a percepción de algo fráxil, lonxe e silencioso á vez, sen o ruído do presente.

É claro que imprimindo en papel prensa non se pode agardar a mesma fidelidade de reprodución que nun papel estucado. Hai que dar por descontado que pola gañancia de punto do papel as fotografías quedarán menos nítidas e con menos contraste, incidindo máis aínda na perda de luminosidade que de por sí provoca imprimir fotografías en CMYK. Con todo, cremos que un fotolibro non debe ser só un catálogo de fotografías en serie, ou a trasposición directa das fotografías dunha exposición a un formato de libro. A mellor maneira de ver e apreciar unha fotografía será sempre poñéndose diante dunha reproducción que fose elaborada con métodos fotográficos de reprodución; un fotolibro, ademais, debe posuír unha narrativa propia, debe contar unha historia…

Aínda tendo ben asumidos os condicionantes que supón imprimir nunha rotativa capaz de facelo a un ritmo de 30.000 xornais por hora, a decisión foi máis doada de tomar polos bos resultados que tiñamos acadado colaborando con Galicia Editorial en diferentes proxectos anteriores. As dificultades doutros tempos nas rotativas para rexistrar ben as cores xa non supoñen un problema, e a gama de papeis dispoñibles supera en bastante ao papel gris de prensa de 42 grs. de sempre, podendo escoller, hoxe en día, entre papeis de diferentes gramaxes e tonalidades de branco. Traballar con perfís de cores calibrados e con procesos de produción moi estandarizados contribúe a evitar sorpresas pouco agradecidas, e máis importante aínda para nós, poder contar coa colaboración, coa profesionalidade e cos coñecementos do persoal que alí traballa.

E na mesma liña de reflexión, sen as ideas, a confianza e o entusiasmo de Simona, non tería sido posible poder afrontar a edición do seu libro desta maneira.

O día de impresión é sempre un momento igual de feliz que inquedo. As boas sensacións veñen de ter rematado unha parte importante do traballo e do devezo de poder ollar o seu resultado. A expectación ten que ver máis con confiar ese traballo a outras mans e con agardar polo desenvolvemento duns procesos nos que, partindo de coñecer o seu funcionamento, resulta sempre aconsellable deixar un pequeno espazo á sorpresa.

O fotolibro Ostalgia de Simona Rota quedou impreso o xoves, e a verdade é que quedamos moi contentos co resultado. A próxima semana está reservada para a encadernación, e poucos días despois, o libro xa estará dispoñible.

Ostalgia · Simona Rota (f.02) Os correos electrónicos, ás veces,...

Mon, 22 Apr 2013 05:41:00 -0400

Ostalgia · Simona Rota (f.02)

Os correos electrónicos, ás veces, traen consigo sorpresas tan pouco agardadas como felices.

Hai case cinco meses recibimos un inesperado correo de Simona Rota comentándonos a posibilidade de editar e deseñar un fotolibro sobre a súa serie ‘Ostalgia’ co motivo da exposición que se levará a cabo na Galería Kursala da Universidade de Cádiz. Nese momento só coñeciamos a Simona por un correo anterior no que, de xeito moi xeneroso, nos comentaba as súas impresións sobre o libro ‘A casa do Oscar’ que editaramos o ano pasado xunto a Luis Díaz Díaz. Non nos deixan de admirar as persoas que por propia vontade escriben un correo electrónico a outras, só para mandar un saúdo e felicitalas polo seu traballo.

Despois, á ledicia do inesperado, sumóuselle a de comezar a construír un libro coas fotos de Simona, coas súas ideas, coa súas palabras… e durante varias semanas, nunha comunicación deslocalizada entre Madrid, Bergondo e Milladoiro comezou a xurdir unha narrativa posible para o libro que transitase sen conflito entre dous lugares: o do fracaso dunha utopía, e a do lugar feliz e amable da memoria de Simona durante a súa infancia en Rumanía. E a cada vez que Simona nos dicía con entusiasmo “Éramos felices!”, contrapoñendo a súa memoria ao ollar estereotipado de occidente sobre os países do leste, apetecíanos, cada vez máis, poder compartir eses lugares que fomos habitando durante a construción do libro e as conversas con con ela.

Por ese motivo e para acompañar a sorpresa incial con outro momento inesperado que pechase ben esta nova viaxe, fainos moi felices —agora a nós—, poder anunciar que acordamos con Simona publicar en Fabulatorio unha edición limitada de 200 exemplares do fotolibro.

A edición de Fabulatorio completará a non venal elaborada co gallo da exposición na Kursala.

A comezos de maio achegarémonos a Cádiz para facer entrega dos catálogos; pouco despois, o fotolibro ‘Ostalgia’, de Simona Rota, estará na web de Fabulatorio agardando por novos destinos.

Nos próximos días iremos dando máis información e compartindo novas.

— Fotografía © Simona Rota. Bosteri Beach Resort. Issyk Kul Lake, Kyrgyzstan, 2010

Conversa no Barrio das Flores Cremos que unha das labores máis...

Thu, 28 Feb 2013 04:29:00 -0500

Conversa no Barrio das Flores

Cremos que unha das labores máis importantes dun editor é a de crear contextos: establecer un lugar amable, ou quizais incómodo, a partir do cal poder comezar a viaxe que propón cada novo libro.

Sempre imaxinamos a serie de cadernos de fotografía de Fabulatorio como pequenas viaxes. Breves traxectos nos que fose posible renovar o noso ollar con novas imaxes: como dar un paseo de domingo por unha alameda, como sair a camiñar polo monte ou como apoiarse no peitoril nunha xanela, e pararse durante un intre a observar algo do que acontece fóra de nós. E aínda así, a pesar da súa brevidade, esas viaxes tamén precisan dunha baliza, ben para marcar o camiño de volta, ou ben ao contrario, para deixar testemuña do non retorno.

En ‘A casa do Oscar’, o primeiro caderno da serie, con fotos de Luis Díaz Díaz das praias de Rio de Janeiro e da ‘Casa das Canoas’ de Oscar Niemeyer –a máis feliz das viaxes para el– ese contexto chegounos, case sen buscalo, nun texto de Chico Buarque. E para celebrar o inesperado encontro, o título do texto, ‘A casa do Oscar’, rematou por ser tamén o título do caderno. Outras palabras, neste caso de Benoît Sindt, compañeiro de Luis durante a súa viaxe polo Brasil, remataban o libro e explicaban outro lugar: o da memoria que as fotografías levan e traen sempre consigo.

Sen embargo, para a edición do novo caderno, con fotografías de Tono Mejuto do Barrio das Flores da Coruña, non foi doado atopar as palabras que arroupasen ben as imaxes, que fosen un fogar. As fotografías de Tono resístense ás categorías, custa traballo definirlles un tempo propio, reflexan só un momento máis dunha continuidade que resulta difícil de explorar; son, en definitiva, como unha desas pequenas viaxes que imaxinábamos dende unha xanela dunha vivenda calquera do Barrio. Así as vemos nós.

E ao final, esa mesma atemporalidade das imaxes, a incerteza de seren pasado, presente, ou quizais tamén futuro, deunos a clave. Pensamos en sentar diante dunha mesa a tres persoas para conversar, tres persoas que fosen elas mesmas testemuñas da continuidade do Barrio, tendo claro que nos interesaba máis a ficción construída da memoria das persoas, que a suposta realidade da documentación histórica.

Poñerlle nome a esas tres persoas xa foi máis doado. Na mesa, sentados para conversar, estarán Andrés Fernández-Albalat (1924), arquitecto, que participou da construcción do barrio durante os anos 60 e 70 do século pasado; Carlos Quintáns Eiras (1962), tamén arquitecto, que hai uns anos decidiu trasladar o seu estudio ao Barrio das Flores e viviu en primeira persoa a súa evolución, e Iago Carro (1981), membro do grupo de arquitectos ergosfera, que ao igual que no caso anterior, decidiron ter tamén o seu lugar de traballo dentro do Barrio. Tres xeracións de arquitectos que para nós representan tres momentos dunha, ou varias, continuidades.

As conversas teñen de malo o mesmo que teñen de bo: non se poden guionizar nin dirixir, evolucionan por elas mesmas, e, como acontece coa memoria, deixan baleiros, espazos sen transitar. Que así sexa, as imaxes de Tono encherán eses baleiros, ou quizáis tampouco, non importa, a nosa intención é só dar os primeiros pasos dunha nova viaxe.

O vindeiro día sábado 2 de marzo estaremos no estudio de ergosfera para rexistrar en video esa conversa, e para poder facelo ben, contaremos coa colaboración e a axuda do director de cine Luís Avilés, non podemos pedir máis.

Xa iremos contando como foi…

(Fotografía de Tono Mejuto)

Niemeyer marchou. Nós despedímolo mentres relemos, nos seus...

Thu, 06 Dec 2012 07:49:37 -0500

Niemeyer marchou.

Nós despedímolo mentres relemos, nos seus debuxos das paredes brancas, que é o máis importante desta vida.

Grazas Oscar.

Boa viaxe.

O segundo volume de Fabulatorio con fotografías de Tono Mejuto...

Mon, 19 Nov 2012 13:04:00 -0500

O segundo volume de Fabulatorio con fotografías de Tono Mejuto xa está en camiño. Na imaxe os primeiros e desorientados pasos polo mundo interior do Barrio das Flores da Coruña.
Que doado resulta editar e comezar a deseñar cun material tan fermoso e inspirador!

http://fabulatorio.org/publicacion/barrio-das-flores-tono-mejuto/

Nos próximos días algunhas novidades e algunha sorpresa…

Na imaxe un dos poucos exemplares que nos quedan de ‘A...

Mon, 19 Nov 2012 12:56:00 -0500

Na imaxe un dos poucos exemplares que nos quedan de ‘A casa do Oscar’. O libro con fotos de Luis Díaz Díaz foi seleccionado para participar na exposición ‘L’autoedició exposada’ no festival internacional de fotografía Scan de Tarragona.

http://www.scan.cat/autoedicio.html

A foto a temos grazas a Jesús Madriñán, outro moi admirado fotógrafo por nós que tamén foi seleccionado para participar na sección ‘Full Contact’ do Festival.

Polo demais, 10 exemplares de ‘A casa do Oscar’, viaxaron as feiras de NY e Tokio grazas ao interese de Motto Books en Berlín (http://www.mottodistribution.com/site/)

Video de A casa do Oscar en Have a Nice Book

Fri, 29 Jun 2012 06:28:00 -0400

Video de A casa do Oscar en Have a Nice Book

Photo

Thu, 21 Jun 2012 20:39:00 -0400

Fabulatorio mantivo unha conversa con Luis Díaz Díaz con motivo...

Wed, 30 May 2012 18:51:00 -0400

Fabulatorio mantivo unha conversa con Luis Díaz Díaz con motivo da edición do libro ‘A casa da Oscar’. A charla tivo lugar nas hortas traseiras do parque de Bonaval en Santiago de Compostela.
Ao longo da conversa, Luis Díaz Díaz fala da súa formación como fotógrafo, dos seus intereses e das súas referencias, comenta o interese actual pola edición de fotolibros, e explica algunha das súas impresións acerca da recente publicación do seu libro.

Video: desescribir e Luis Díaz Díaz

Agradecementos: Daniel González Portela / Felipe Trillo

CC. BY-NC-ND

2012

Dende onte pola tarde o volume f.00 de fabulatorio está...

Wed, 30 May 2012 03:51:00 -0400

Dende onte pola tarde o volume f.00 de fabulatorio está oficialmente agotado. Estamos moi agradecidos a todos os que adquiristes un exemplar e en xeral a todos os que vos interesastes por el.

http://fabulatorio.org/publicacion/fabulatorio/

Este xoves 31 de maio presentamos a editorial e o libro ‘A...

Tue, 29 May 2012 04:23:00 -0400

Este xoves 31 de maio presentamos a editorial e o libro ‘A casa do Oscar’ na librería do CGAC en Compostela, outro dos puntos de venda dos libros de Fabulatorio xunto coa librería Formatos na Coruña.

‘Mais Grotesk’ é o nome da tipografía que empregamos...

Thu, 17 May 2012 19:54:00 -0400

‘Mais Grotesk’ é o nome da tipografía que empregamos para deseñar o libro ‘A casa do Oscar’.

A ‘Mais’, é unha tipografía sen remates, encadrada estilísticamente no grupo das ‘neo-grotescas’: tipografías que toman de referencia aquelas que durante a modernidade dos anos 50-60 tiveron unha maior aceptación (akzidenz, helvética, univers,…), pero evolucionadas e adaptadas ao momento actual tanto formal como funcionalmente.

A ‘Mais Grotesk’ é, ademais, unha tipografía que posúe un rasgos de identidade moi definidos, e que, pola súas características, permite un uso flexible e funcional tanto en corpos de tamaño pequenos como grandes, ou ‘Display’.

Tivemos a sorte de que o seu deseñador, Marcos Dopico, nos permitise traballar con ela para o que foi, como no caso de Fabulatorio, a súa estrea pública.

Pódense ver máis imaxes da Mais Grotesk, e coñecer algo do seu proceso de deseño, no flickr de Marcos Dopico:
http://www.flickr.com/photos/marcosdopico/sets/72157627169044024/with/7141425949/

Marcos Dopico é tamén autor dun recente e imprescindible libro sobre a historia das tipografías sen remates: ‘La evolución de los caracteres de palo seco’, editado pola editorial Campgráfic no ano 2011.

Seguimos no Fabulatorio!

Thu, 17 May 2012 16:46:00 -0400

Onte foi un día moi especial para nós.
Poder compartir, e finalmente darlle luz a algo que levabamos moito tempo preparando, fixo do día de onte un momento feliz.

A rolda de agradecementos é extensa: a Luis Díaz Díaz por fabular e estar no laboratorio coma un de nós durante tanto tempo, a Felipe Trillo, Trespés arquitectos e ao equipo da librería Formatos polo darnos un lugar, a todos os que colaboraron nalgún momento con fabulatorio para que chegase a ser unha realidade, a todos os que vos animastes a levarvos un exemplar, que fostes moitos! (grazas de verdade), e sobre todo, aos que enchestes a librería Formatos para acompañarnos.

E agora? Pois se estades aínda con ganas, (agardamos que sí), iremos anunciando novos proxectos, algúns que xa están en camiño, e outros aos que aínda lle estamos dando forma.

Grazas a todos!

Seguimos no fabulatorio!

A casa do Oscar Fotografías de Luis Díaz Díaz Textos de Chico...

Mon, 14 May 2012 08:09:00 -0400

A casa do Oscar

Fotografías de Luis Díaz Díaz

Textos de Chico Buarque e Benoît Sindt

Deseño de desescribir

Presentación o 16 de maio na Librería Formatos da Coruña ás 20:00 h

Ideario Fabulatorio

Fri, 11 May 2012 06:24:00 -0400

— Fabulatorio é un proxecto editorial promovido por Cibrán Rico López e Suso Vázquez Gómez, arquitectos de formación dedicados profesionalmente ao deseño gráfico e editorial baixo o nome de desescribir.

desescribir é a maneira que temos de expresar un desexo e unha necesidade: a de cuestionar, poñer en dúbida e, cando é posible, repensar a realidade. Ás veces, se hai sorte, desescribir é tamén descubrir. Cremos que os libros aínda conservan a capacidade de xerar asombro e fascinación, que seguen alumeando ideas, emocións e espazos agochados para seren descubertos.

— Os libros son, no seu cerne, comunicación: a que transmite e establece novos discursos colectivos, e tamén, a que acontece de xeito íntimo nunha tarde de domingo cun só lector. Os libros propoñen outros tempos. Os libros están nun permanente proceso de seren escritos e desescritos. Ese proceso é o que quere ser Fabulatorio.

— Fabulatorio é un lugar para as historias que aínda non foron contadas e para as que pensamos que precisan ser contadas de novo. Como nos contos tradicionais, as historias de Fabulatorio, serano para ser lidas e olladas en si mesmas, pero tamén para imaxinar outras ideas e outros mundos posibles; por iso, Fabulatorio será fábula.
Fabulatorio quere experimentar nas capacidades que ten o libro como obxecto para comunicar significados; investigar na relación íntima entre a súa forma e a transmisión e a posta en valor do seu contido.

— Fabulatorio é unha experiencia editorial coa vontade de producir de maneira responsable, coa pequena e mediana industria local, optimizando procesos e publicando tiradas reducidas con prezos de venda asequibles.
Quere fuxir, ao mesmo tempo, da idea do libro exclusivo orientado a coleccionistas e da produción editorial en masa coa única fin de abaratar custos. Quere establecer redes e empregar os medios de difusión actuais para reducir a distancia entre os que producen e os que se interesan polo que está producido.

Cre que o modelo convencional de distribución é insostible e inxusto, encarece sen necesidade o acceso aos contidos e premia ao intermediario en detrimento do autor/traballador. Por iso a canle principal de distribución dos libros editados por Fabulatorio será a de fabulatorio.org e algunhas librarías de referencia cuxa actividade transcende a venda de libros. Salvo excepcións, os contidos e o propio deseño, publicaranse cunha licenza Creative Commons BY-NC-SA.

— Fabulatorio nace tamén coa convicción de que o valor do global reside no local. Quere establecer unha comunicación global consciente de que o local é o que diferencia e lle dá autenticidade a esa comunicación. A nosa diferenza é Galicia, por iso todos os libros editados en Fabulatorio o serán sempre en galego. Ademais, na medida das posibilidades e das oportunidades, os libros serán traducidos a outros idiomas.
A dimensión do ‘local’ estará presente tamén nos contidos, tanto coma espazo de difusión para autores e creadores galegos, como na investigación en temas e ideas que poidamos considerar de interese no noso contexto, sen renunciar a que reverberen do mesmo xeito noutros lugares e noutras realidades.

— Para Fabulatorio, o local será tamén producir e desenvolver proxectos editoriais coa industria do prelo e cos profesionais máis próximos, nunha dinámica de aprendizaxe e intercambio de coñecemento mutuo e leal, interesada en acadar resultados gráficos e editoriais de calidade.

— Fabulatorio xorde sen apoios institucionais nin subvencións públicas de ningunha clase, aínda que non renuncia a elas para acometer algún proxecto editorial específico. Fabulatorio nace, pois, da ilusión, do apoio, do compromiso e do traballo de diferentes persoas e profesionais que o fan posible.

— Desexamos que Fabulatorio, a través dos libros, sexa un lugar de encontro de sensibilidades e de intereses comúns. Gustaríanos, no 2012, facer nosas as palabras que Anxo Casal lle dirixiu a Rafael Dieste no ano 1928 co gallo da presentación da editorial Nós:

“En NÓS estamos todos: uns sabemos xa do noso enrolamento e outros coma vostede, que tamén son da compaña, témolos a bordo aínda que non se teñan decatado.”

Fabulatorio
Bergondo-Ames
Primavera do 2012

Cartel promocional de ‘A casa de Oscar’ de Luis Díaz...

Thu, 10 May 2012 06:16:00 -0400

Cartel promocional de ‘A casa de Oscar’ de Luis Díaz Díaz, o primeiro libro editado por Fabulatorio.

Impreso no prelo de Litonor empregando máculas de impresión do propio libro.

“O mais importante não e a arquitectura, mas a vida, os amigos,...

Thu, 10 May 2012 05:56:00 -0400

“O mais importante não e a arquitectura, mas a vida, os amigos, e este mundo injusto que devemos modificar”.

“The most important thing is not architecture but life, friends and this unfair world that we must change”.

Oscar Niemeyer

Debuxos e escritos de Oscar Nimeyer nunha das paredes do seu estudio en Rio de Janeiro.

Fotografía de Luis Díaz Díaz

Caderno de notas

Thu, 10 May 2012 05:40:00 -0400

Costou, pero ao fin comezou a chover e xa chegou a primavera. E coa primavera chega tamén Fabulatorio.

O día 16 de maio, na librería Formatos da Coruña, terá lugar a presentación da editorial e do primeiro libro publicado: ‘A casa do Oscar’ con fotografías de Luis Díaz Díaz e textos de Chico Buarque e de Benoît Sindt.

A partir de hoxe, neste caderno de notas, iremos informando de novas sobre a editorial e contando algunhas das historias e das experiencias que están por detrás da edición de cada novo libro.

Nos próximos días, ademais, lanzaremos a web definitiva da editorial onde se dará máis información de cada un dos libros.

Choveu e xa escampou, e despois duns meses sementando, nace Fabulatorio.